Mainondo herri-eskola handitzeko 900.000 euroko diru-laguntza eskatu du Udalak Jaurlaritzako Hezkuntza Sailean; %60ko laguntza lortzea aurreikusi dute udal arduradunek.
Aitatu dezagun egitasmo horren barruan haurtzaindegi publikoa egokitu gura duela Udalak. Joan zen abenduan onartu zuen udalbatzarrak haurtzaindegirako landu duten aurreproiektua.
Mainondo herri-ikastetxearen aurrean eraikin berria egiteko aukera aztertu dute. Beheko solairuan haurtzaindegia atondu gura dute eta erdisotoa herri-eskolaren erabilerara bideratu. Bertan, besteak beste, psikomotrizitate, gimnasia eta ingeles gela atontzea aurreikusi dute. Herri-eskola txiki geratzen hasita dagoela adierazi izan dute udal arduradunek.
Hezkuntza Sailaren diru-laguntza jaso arte ez dituzte lanak emango, Aritz Otxandiano alkateak azaldu duenez. “Ebazpena izan daiteke apirilera arte ez jakitea. Ondoren, dena ondo joanez gero lanak irailean hasi daitezke”.