2016ko urr. 18a, 10:15
Herriko argiteria aldatzeko lanean hasi da udala, 57.500 euroko aurrekontuagaz. Hainbat helburu ditu atzean egitasmoak, eta horietako bat, herriko zenbait puntu ilun argiztatzea. Beraz, segurtasuna handitzeko asmoa dute aldaketa honegaz. Adibidez, Hontza museoa eta lehengo estankoaren arteko kantoiartea edota eliza parea dira puntu beltzetako batzuk.
Bestalde, udalak azaldu du BI-623 errepidearen argiztapena ez dela egokia, eta eremu horretan farola berriak ipiniko dituzte. Horrela, Kirikiño kalean eta plazan bertan igarriko da argitasun handiagoa.
LED teknologia
Ipiniko diren farola berriak kontsumo baxuko LED teknologiakoak izango dira, eta telegestio sistemagaz funtzionatuko dute. Horri eskerrak, elektrizitatearen gastu ekonomikoan beherakada egotea lortu gura du udalak.