Dudarik ez dago azken hileetan bisitarien kopurua hazi egin dela Mañarian, Hontza natur zientzien museoa zabaldu eta gero. Urtebetean, 2.000 lagunetik gora pasa dira museotik. Eta, turisten joera eta nahiak ezagutzen dituztenez, museokoek landu dute Turismo Planaren zirriborroa, udalaren enkarguz.
Planak hainbat jarraibide eskaintzen ditu, eta udalak pausoz pauso aztertuko ditu, gero bideragarri direnak garatzeko. Beraz, epe luzeko ikuspegia dauka planak, eta alkateak esan du moldagarria ere izango dela.
Herrigunea eta auzoak
Proposatutako ekintzak herrigunerako eta auzo edo mendi inguruetarako dira. Esaterako, herriguneko etxeen fatxadetan, herriko historia islatuko duten graffiti artistikoak margotzea aurreikusi dute, bizilagunekin adostu eta gero, noski.
Historiaz aparte, ondare natural handia dauka Mañariak: kobazuloak, mendiak, harrobiak, putzuak... Umeei begira, fauna eta floraren inguruan informatuko duten ibilbideak sortzea proposatu dute. Mendi ibilbideak eta lasterketaren bat eratzeko asmoa ere badago planean. Bestalde, autokarabanen gunea eta autobusen aparkalekua ere badaude aukeren artean.
Horrela, museoaren aitzakian datozenek egunpasa egin ahalko dute herrian.