Etxe gutxien dituen alternatiba aukeratu dute Plan Orokorrerako

Anboto 2014ko abenduaren 15a
Deskargatu Info Ahotsak :

Guztira, 92 herritarrek eman dute botoa Hiri Antolamendurako Plan Orokorraren inguruko galdeketan.

Azaroaren 21ean eta 23an Hiri Antolamendurako Plan Orokorrari (HAPO) buruzko herri galdeketa egin zuen udalak, eta azaroaren 28ra arte ere iritzia emateko aukera eman zuen. Guztira, 92 lagunek hartu dute parte galdeketan. Duela urtebete hasitako partaidetza prozesutik sei alternatiba posible atera ziren, eta herritarrek B ereduaren alde egin dute, etxe gutxien jasotzen dituen ereduaren alde. 90 etxebizitza eraikiko dira, elizaren atzealdean eta herritik Urkiolarako irteera inguruan. Beste eredu bik ere 90 etxebizitza eraikitzea aurreikusten zuten, eta gainerakoek 107, 118 eta 156.


Zerbitzu kulturala edo soziala eskaintzeko ekipamenduei dagokienez, etxeen beheko lokaletan bi gune sortuko dituzte, eta beste handiago bat herrigunean. Beste espazio publiko bat ere jaioko da –plaza edo parkea izan daitekeena–, eta ekipamenduaren inguruan kokatuko da.

Herrian erroldatuen %20k hartu du parte galdeketan, eta Endika Jaio alkateak esan du aurreikuspen hobeak zeuzkatela. Baina uste du horrek ez diola zilegitasunik kentzen iritzi prozesuari. Planaren aurrerapena onartu, eta idazten hasiko dira 2015ean.

Herririk herri Mañaria
ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!