Domekan, Santa Ageda egunean, kopla kantuan irteteko deia egin dute herrian. Iaz batutako dirua Tailandiara bidali zuten Gobernuz Kanpoko Erakunde baten bitartez. Guztira, 400 euro eman zituzten dohaintzan. Aurten ere, batutako dirua (San Juanen bazkaltzeko erabilitakoa kenduta) antzeko erakunderen bati emango diote: Aurten, abesten irteten direnek, egunean bertan pentsatuko dute nori eman.
Goizeko 9:30ean jarri dute hitzordua, herriko plazan. Goizean zehar, Aldebarrena, Arrueta eta Urkuleta auzuneetako baserrietan ibiliko dira. Ondoren, eguerdi partean, San Juaneko txokora joango dira oinez, eta hantxe bazkalduko dute batzen diren guztiek. Arratsaldean, Aldegoinean eta herrigunean jardungo dute koplatan.
Igaz, sei-zazpi lagun batu ziren. Aurten 15 bat batzea espero dute, nahiz eta badakiten zaila izango dela, San Blas egunaren biharamuna delako.