Zapatuan hasiko dituzte Mallabiko Zengotita auzoko jaiak, txopoa jasota, 20:00etan. Ondoren, auzokoentzako afari-merienda prestatuko dute, jaiei behar den bezala ekiteko.
Domekan, berriz, mezaren eta dantzarien ostean, desafio berezia ikusi ahal izango dute gerturatzen direnek. Aterpe Eraikuntza enpresaren zaldiak Oiartzun-Astigarragako Emarri Emakume Proba Taldearen indarra neurtuko du. Izan ere, hogei minutuko proban, zaldiak emakumeen bikoitza egitea da erronka. Arratsaldean, ostera, bolo txapelketan elkartuko dira. Era berean, umeen jolasak eta patata tortilla txapelketa izango dituzte gozagarri.
Astelehenean, 12:00etan meza eman eta gero, Mallabiko Gazte Alai dantza taldeak erakustaldia eskainiko du. Bolo txapelketa eta asto probak ere izango dituzte.