Udalak ume gehiago inskribatzeko egindako ahaleginaren ostean, ume bi gehiago matrikulatu dira 0-2 urteko gelan. Izan ere, epez kanpo izen-emateko aukera eman dute. Beraz, datorren ikasturtean, Haurreskolak ateak zabalik izango ditu.
Udaleku “zoragarriak”
Gaur amaitu dituzte Mallabiko udalekuak, eta Ane Loiola hezitzaileak balorazio oso ona egin du. “Dena zoragarri joan da, eta, gainera, eguraldiak ere lagundu du”. Udalekuetako 50 plazak bete egin dira aurten. 4 eta 14 urte arteko umeak eta gazteak lau taldetan banatu dituzte, adinaren arabera.
Azken hiru asteotan egoitza nagusia eskoletan izan badute ere, irteera ugari egin dituzte. Berrizko igerilekuetara eta Oñatiko (Gipuzkoa) kobazuloetara joan dira, besteak beste.