Mallabiko Berbalagun egitasmoa martxan, euskararen erabilera bultzatzeko

Anboto 2015eko urtarrilaren 8a
Deskargatu Info Ahotsak :

Mallabiko AEK-ko ikasleak iazko ikasturte amaieran

Euskararen erabilera bultzatu guran, Berbalagun egitasmoa jarriko dute martxan Mallabian. Juanmi Bravo AEK-ko irakasleak eta praktika egitasmoaren arduradunak azaldu duenez, “baserri auzoetan ez bezala, herrigunean euskararen erabileraren beherakada nabarmena izan da azken urteotan, herrira bizitzera etorritako jendea dela-eta”. Gaineratu duenez, azken bi hamarkadetan hainbat herritarrek ikasi dute bertako euskara ikastaldeetan. “Egun, ikasle hauen helburua kalean eta bertako herritarrekin euskara erabiltzea da”. Ohiturak aldatzea, berriz, ez da erraza. Izan ere, pertsona horien orain arteko harremanetarako hizkuntza gaztelania izan da, baita euskaldunekin ere.


Ohitura horiek aldatu guran, Berbalagun egitasmoaren erronkak ekintza zehatzetan oinarritu dituztela jakinarazi dute. Herrian astean behin bilduko diren bi berbatalde sortuko dituzte. Bata goizez arituko da, eta bestea, berriz, arratsaldez. Era berean, Mallabiko eskolan Gurasolagun talde bat sortzeko asmoa dute.

Hainbat ekintza
Urtean barrena berbataldeetan jarduteaz gainera, sei ekintzatan parte hartzeko aukera izango dute: eskolan hitzaldi bat, kultur etxean ikastaro bat, hiru berba afari eta ekainerako mintzodromoa antolatuko dituzte, besteak beste.

Herririk herri Mallabia
ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!