Mendi duatloi zirkuituko azken aurreko proba domekan Mallabian

Anboto 2011ko aza. 26a, 08:45

$\"\"$ Mendi duatloi zirkuituko azken aurreko proba domekan Mallabian.

Domekan, 11:00etatik aurrera, aurten sortu duten Euskal Herriko Mendi Duatloi Zirkuituko zazpigarren proba lehiatuko dute Mallabian. Ondoren, Zallakoa bakarrik geratuko da zirkuitua amaitzeko.

Parte-hartzaileek 3,1 km-ko zirkuituari itzuli bi emango dizkiote lehenengo; ondoren, bizikletan, 8,5 km-ko bidea osatuko dute eta amaitzeko berriro korrika ibiliko dira beste itzuli batean. Duatloia herriko plazan hasi eta amaituko da, eta hantxe egokituko dute anoa-puntua ere. Lasterketa amaitzean pastel, fruita, salda eta abarrekin betetako luntxa dastatu ahalko dute parte-hartzaileek eta hainbat erregaluren zozketan sartuko dira.

Faboritoei dagokionez, gaur egun Endika Gartzia eta Amaia Luqui dira sailkapeneko liderrak. Mallabikoa azkenaurreko proba da, bainaa irabazleak Zallan erabakiko dira, duatloi hark puntuazio bikoitza duelako; irabazleak, esaterako, 50 beharrean 100 puntu lortuko ditu.

Ekimena duatloiaren munduko hainbat elkarteren elkarlalanagaz eraman dute aurrera, baina herriz herriko lasterketak herrietako elkarte eta eragileen lanaren ondorio dira. Mallabian herri ekimenaren bitartez antolatu dute: “Mendiz inguratuta gaudenez, beti izan dugu mendi lasterketa antolatzeko gogoa, eta proposamena heldu zitzaigunean gogo handiz hartu genuen. Mallabitar askok parte hartu du antolaketa lanetan”, azaldu du Xabat Areitoaurtenak.

Gaztetxoen duatloia plazan

Gaztetxoei begirako duatloia ere prestatu dute. Plazan egokitutako karpan korrika egiteko zinta eta bizikleta estatikoa ipiniko dituzte, eta hantxe erabakiko dute gaztetxoen artean txapelduna nor den.

Mallabia

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.

EGIN ZAITEZ KIDE!