Gatibu, KOP, Zain eta Esne Beltza rock taldeek kontzertua eskainiko dute urriaren 29an.
Mallabiko urriko jaiak atejoka dauzkagu. Urriaren 28an, 16:30ean, umeentzako tailerra izango da, eskolako frontoian, guraso elkarteak antolatuta. Txupinazoa 18:00etan jaurtiko dute, eta enkarteladan batuko dira. Elizpeko pilota txapelketaren finala 19:00etan jokatuko dute. Tabernetan egingo duten bertso-poteoan Beñat Ugartetxea eta Gorka Imaz izango dira bidelagun. Oilasko pintxoak afaltzeko aukera egongo da 21:30ean, Lumagorriren eskutik –txartela 1,50 euro–, eta erromeriak girotuko du gaua, Trikileku taldeagaz, plazan.
Urriaren 29an, arratsaldeko 16:00etan, umeedako olinpiadak prestatuko dituzte. Gauean, berriz, Gatibu, KOP, Zain eta Esne Beltza taldeek kontzertua eskainiko dute.
![\"\"](\"/fc_imagenes/esne-beltza.jpg\")
Urriaren 30ean, meza ondoren, gaztetxoen pilota partidak jokatuko dituzte. Arratsaldean, mus, tute, asto eta briska txapelketak jokatuko dira tabernetan. Aizkolaien erakustaldia eta txokolatada plazan izango dira.