Gabonak: lehen zatia, amaituta

Bai. Segundo gutxi falta dira eta lehenengo zati honetako erasorako azken baloia daukagu. Garrantzitsua da jaurtiketa on bat egiteko aukera lantzea, saskiratzen badugu bigarren zatia ondo hasteko aukera izango dugulako, eta horrekin denboraldiko helburuak betetzen jarraituko dugu, azken txanpan topera egoteko. Etxeko lanak garaiz egitea komeni da, amaierako larritasunak alboratzeko.

Hirugarren Mailan (aurreko EBA maila) dabilen Tabirako Baque mutilen taldea ez dabil ondo. Hamar partidutik garaipen bakarra dauka eta, zoritxarrez, Bilbao Basket Fundazioaren aurkako partidua galdu egin zuen, gutxigatik izan bazen ere. Denboraldi zaila eta gogorra biziko dute, baina ikusitako hobekuntzek taldea indartu egin beharko dute, hurrengo partiduetan garaipenak lortzeko. Batez ere Landako kiroldegian jokatuko direnak. Garrantzitsua izango da Durango gotorleku bihurtzea. 

Tabirako Baqueren nesken taldeak, ostera, hiru garaipen lortu ditu jarraian azken jardunaldietan, eta sailkapenean bosgarren postura igo da, aurretik daudenengandik garaipen batera. Aurreko denboraldian landutako oinarriak taldea indartu egin duela nabari da eta lortzen ari diren emaitzek taldearen lana erakusten dute. 

Egunotan 2024ko azken jardunaldiak jokatuko dituzte eskualdeko talde guztiek, eta ea emaitza onak lortzen dituzten, 2025. urtea topera hasteko. Aurrera!

Bien bitartean, Gabonetan, hainbat torneo edo txapelketa jokatuko dira. Durangon, adibidez, 2011ko eta 2012ko taldeen torneoak egingo dira, abenduaren 27an eta 28an. Bestalde, Zaldibarren Zalduak abenduaren 21erako antolatu du bere Gabonetako txapelketa; inguruko talde guztiei egin zien gonbidapena. 

Ia egunotan denok ederto baten amaitzen dugun urtea eta topera disfrutatzen dugun. 2025a urte oparoa izan dadila guztiontzat!

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!