Eduki hau partekatzeko esteka arbelera kopiatu da.
Izena duena bada. Edo hori esaten da, behintzat. Izendatze hutsak ematen diola izatea zerbaiti, bestela nekez existituko litzatekeela. Baina, kontrara, izena duen gauza asko ez da. Toponimia da horren erakusle, eta leku guztietan lez, Durangon badaude adibideak: Ezkurdin ez dago haritzik, Goienkalea ez da gorengo kalea, Pinondoko arbola nagusia Ginkgo biloba da, Landakon ez da landarik ikusten, Kalebarriak urte mordoa ditu, udaberrian ez dago otalorerik Otamotzenan, Sasikoan inori ez zaizkio prakak urratzen, Mataderoan ez da txahalik hiltzen, Kurutziagan gurutzerik ez dago eta Arripausuetan erreka beste modu batera pasatu behar da.
Baina kontuz, toponomiak ez du gezurrik esaten: ez diren lekuak esaten ditu.
Horregatik, toponimia herri gogoa ere bada. Avenida del Generalísimo zena Askatasun etorbide izendatu zuten duela hamarkada batzuk, eta badira hilabete batzuk Independentzia plaza daukagula San Fauston.
Toponimia zerbait bada fikzioa da, fikzioa bere zentzu performatiboenean, erakusten digulako esaten dugun hori posible dela hemen eta orain, bizi gaitezkeela ezleku horietan, Anboto mendi bat baino gehiago izan daitekeela, adibidez. Historia izan daitekeela orain, gure gogoa gogo hutsa baino gehiago. Ez den herri bat badela hemen.
