Agian zerbaitek gogoraraziko zidan. Euskararen aldekotasunari Miróren koadro haren antza hartuko nion. Herri honetan denok ei gaudelako euskararen alde. Edo hori diogu. Hori daukagu eskegita gure eraikinetako balkoi eta kristaletan, kamisetetan, urtean behineko ekimenetan hori esaten dugu. Gu ere euskararen alde.
Euskararen alde dauden bozeramaileak ETB1en erdaraz, ondo uler dakien. Euskararen aldekoak protokoloak erdaraz bidaltzen, garrantzitsua da eta, euskarazkoak gero etorriko dira, itzultzaileak lana amaitzen duenean. Euskararen alde daudenak bilerak erdaraz dinamizatzen, inork ezer galdu ez dezan, badaezpada. Euskara maite duten komunikabideak erdaraz publikatzen %95 batean, jendearengana heltzeko.
Euskalduntasuna ulertzeko modu menpeko baten alde. Dutxako lurrun artean apurka-apurka usteltzen utzi gura duten zerbaiten alde.