Han Europako herri aurreratuena gara. Han ez da baimentzen osasunarekin negozioa egitea, eta umeek Lau Teilatu abesten dute osatzen direnean. Han etxean gelditu ginen birusaren hasiera-hasieratik, aurreratuak garelako, zientzialariei egin genielako jaramon eta ez dirua irabazi gura duen jendeari. Han amama Lutxi maite dugu, eta zaintza sare publikoak ditugu. Han enpresak publifikatu egin ditugu, diru irabaziak egoera berezi honi aurre egiteko erabili daitezen, eta produkzioari buruzko erabakiak inoren presio barik hartzen ditugu orain. Han jendearen beharrizana asetzeari deitzen diogu ekonomia. Hara ailegatzean ontziak erre genituen, eta ordutik ez da injustizia onartzen, eta horretan, soilik horretan, Jaungoiko Aita baino sektarioagoak gara.
Europako herri aurreratuenetako bat gara. Hemen ez dugu osasungintza publikoa eta kalitatezkoa aldarrikatzen, hemen jendeari umeen minbizia ikertzeko dirua ipini dezan eskatzen diogu poz-pozik, lau teilatu gainean. Hemen ez gara etxean geratzen, lanera goaz. Hemen amama Lutxi maite dugu, baina ekonomia gehiago. Sentitzen dut, amama, ekonomia da, ziur ulertuko duzula, aurreratuak gara. Pentsa zein aurreratuak garen, agian apurka-apurka birusa elkarri kutsatzen hasiko garela, horrela kalera irten ahalko garelako immune gaudenok, herrialde atzeratuak txertoaren zain dauden bitartean. Ez gara atzean geratuko. Ekonomia ez dago geldi. Hemen kafeari Baque soziala esaten diogu. Hemen enpresariek dirua irabazten jarraitzeari ekonomia deitzen diogu.
EGIN ZAITEZ KIDE!