Larregi

Erabiltzailearen aurpegia Libe Mimenza Castillo 2022ko aza. 18a, 08:30

Bizikleta eta zakutoak hartuta joan nahiko zenuke naturak dena hartzen duen paisaia batera, eta handik Zeelanda Berriko Milford Sound inprimatuta daukan postal bat bidali, edo Norvegiako Lofoten irlak, Islandiako Westfjord penintsula, Eskoziako Hebridak uhartedia zein Kanadako Peyto lakua. Zuhaitz espezie ezberdinen lurrinez ohartzeko patxadarekin bizi. Txorien kantuak eta txioak bereizi. Hosto gorrien bilduma egin eta bidean agertzen diren ustekabeak ospatu. Basatia den handitasun horretan bakardadea sentitu. Zeu eta zeure hats beroa baino ez bertan, bakarrik egotearen pribilegioa praktikatzera joatearen ederraz gogoetan.

Zenbat lur bizitza bakarrarentzat.

Po-po-pooooooo. Autoak bereganatu du zure arreta: po-poooo, pooooo! Rickshaw bati ari zaio imintzioka gidaria haiena soilik den xextran. Kolore mosaiko bat duzu alboan. Tarrat moztu dute sari bihurtzeko oihal laranja. Hor doa mugikorrari oihuka hitz eginez gizon bat. Beste bat. 12 kontatu dituzu. Arrautza kaxak dozenaka aurreko mostradorean; ekilibrioan, bizirik kaiolatan sartutako oiloen gainean. Kakaraka eta zalapartaka. Danda lurrera zabor poltsa bat. Gora begiratzean kortina horixka baten azken punta baino ez duzu ikusi. Izerdi usainak hartu du dena. Eta sirena. Ni-no-ni-no-niiiiii-nooooo. Ustel kiratsa. Barruraino. Balantzaka eta zorabiatuta karrika zaratatsu eta gainpopulatutan.

Zenbat lur behar da hainbeste bizitzarentzat?

8.000 milioi biztanle zenbatu dituzte Lur planetan —tartean %0,0125 zorioneko euskaldun—.

Lurra tonutik irtendako bozgorailu bat da.

Gehiegi gara bizi garen bezala bizitzeko.

Larregi.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!