Ilarak

Erabiltzailearen aurpegia

Lurrera begiratzean ohartu da haizea altxa dela, aireak darama saltoka eta bidean zirkuluka maskara urdinkara bat. Han beste bat. Ikaraz bezala behatu du zerua, ez baitu euririk nahi. Barrena ere busten zaio langarra hasteaz bat, eta umeltasunak tantaka egiten du habia bere baitan halako egunetan. Itsaso bat bezain urdina irudikatzen du malko guztien almazena.

Zain dago. Bart gauean Netflixen duela gutxi estreinatu duten Worn Stories seriearen azken atalaz aritu dira gustuko duen Twitch kanalean, denek azaldu dute haien bizitzako jantzi berezia zein den. Berak ere badu kamiseta gorri bat, logotipo handi bat daukana paparrean, seguru sentiarazten duena. Eta sexy. Gaur bezala. Zain dela egin du selfie bat, eskua gora, plano pikatu lirain baten bila. Erreakzioak nahi ditu. Instagrameko txat leihoetan aktibatzen diren jakinarazpen gorrien segidak berotzen du. Baina zain dago. Berak jaso nahi duen mezuaren zain. Bitartean Tik Tok ireki du. Bada challenge bat aste honetan, bere lagun guztiek egin dute dagoeneko: pailazo filtro bat jartzea da erronka eta gisa horretara norbere bizi erabaki lotsagarriak kontatzea edo pailazokeria intimo absurdoren baten berri ematea. Zer kontatuko duen erabaki zain dago. Ez daki. Eguerdia da eta bateria agortzear dauka, berriz. Mezu bat pantailan: — Bazatoz? Erantzuna idatzi du arrapaladan: — Laster (eta bihotz hegalari bat gehitu dio alboan). Ea non karga dezakeen albait arinen. Zain dago.

Wasim da bere izena. 16 urte ditu. Sirian jaio zen, baina batzuetan ez daki nongoa den. Hiru ordu daramatza ilaran. Kara Tepen, Lesbosen, errefuxiatuen esparruan. Zaporeak elkarteak Euskal Herrian bildutako esnea eta fruta jaso zain. Ia bizi osoa darama zain.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.