Oro har, euskalgintzan giro negatiboa sumatzen badute ere, Durangoko Azokaren kasuan baikorra naiz. Euskal Herriko erreferente kultural garrantzitsua izanik, hurrengo urteetan ere sendo jarrai dezan arrazoiak ikusten ditut.
Alde batetik, euskal kulturaren txikitasunak –ez naiz kalitateaz ari– eta geografia hurbilak, lauzpabost egunetan arlo desberdinetako adierazpide esanguratsuenak bildu eta taularatzeko aukera ematen du.
Bestalde, euskaltzalea oro har kultura zalea da. Besteak beste, kulturak ematen diolako euskaraz aritzeko ekosistemarik egokiena.
Ezin esan gabe utzi Durango, eta batik bat Durangaldea, horrelako jarduera baterako oso eremu aproposa dela. Zergatiak asko dira eta horiek zerrendatzea hurrengo baterako utziko dut.