GIZAKI MODERNOA
Ordainketa dut espetxe,
eta ordainketa bakoitza neure izatearen inguruan
jartzen dudan
burdin-barra.
Ordainketa artetik ageri dut aurpegia
barrote biren tartetik,
eta belarriak burdinezko barra bertikal banaren kontra
jarrita,
zurruntasun horren bitartean sartzen dut begitartea,
eta estatasun horretan arnastu egiten dut, sakon,
udaberri atal bat,
eta gau izarreztatu zati bat,
edo usnaka aritzen naiz
azken udagoienean eroritako orbel
gorrixkaren baten gainean.
Atzerantz egiten saiatzen naiz
ibilitako bidea desibiltzen,
hipoteka zaharrek galarazten didate bizkarra, ordea.
Sabaitik gora
ahaleginetan nabil zeru txatal bat arnasteko,
mugimendu bakanena ere galarazten
didaten burdinen artetik.
Ordainketa dut espetxe,
eta ni neu kartzelazain.
Udaberri osoak eta gau beteak arnastuko nituzke
birika askeak aseko nituzke,
estatikaren prostituzioari uko egingo banio.
Erne zaiztezte larreetan aske, loreok!
Ikusi dezakedan udaberri puska honetan
arnastu ezazue apal eta eder zeuon estetika naturala,
erne zaitezte aske!
Nik urregorriz estatzen ditudan bitartean
ito egin behar nauten barroteak.
RAFA UGALDE
Durangon, 2019ko maiatzaren 10ean.
Hondar Aleak liburuko poema