ESANAHIAK HIZTEGIETATIK AT

Erabiltzailearen aurpegia

Eider Gorritxategi Hitzez eta Ahotsez VI. Irakurraldian berak sortutako "Esannahiak hiztegietatik at" testua irakurtzen Plateruena antzokian.

 

 

 

ESANAHIAK HIZTEGIETATIK AT

Hiru aldiz errepikatu dut

hitz berbera,

nire baitarako.

Laugarren bat

ahoz goran,

askatasuna.

Nola esan,

nola definitu,

nola egin

benetan posible.

Esanahi anitzak

dituela otu zait:

Politegiak,

poetikoegiak,

edo politikoegiak akaso.

Sukaldeko pila gabeko erlojuari

geratu naiz so,

erantzunen esperoan.

Begiak,

hamarrak eta bostean iltzaturik.

Hitz handiegiak

besterik ez ditut buruan.

Laguntza bila ekin diot orduan,

ahaide eta lagunei

askatasuna zer den galdetuz.

Galdera bat

egin didate lehenik,

ea askatasun osoa duten

galderari erantzuteko.

Baietz erantzun eta

pentsakor gelditu naiz.

Beste dozena bat erantzun jarraian:

menpekotasun eza

dela askatasuna,

ezintasun eza,

Benito Lertxundiren Loretxoa kantua,

Erabakitzeko gaitasuna,

ahalmena,

eskubidea

eta potoloegiak diren beste zenbait hitz.

Bat batean argitu didate bidea

bi galdera eginez.

Bat.

Benetan aske al gara

geure askatasuna helburu bakartzat dugunok?

Bi.

Aske izan nahi genuke,

baina lasai biziko ote ginateke gainerakoei

aske izateko aukerarik eman gabe?

Kafeari kea dario oraindik,

nire buruaren pare.

Errotatibak martxan jarri dira

nire barnean.

Egoista xamarrak izan ohi gara gizakiok maiz,

nor bere zilborraren baitan bildurik,

baina hala ere,

pozten gaituzte besteen askatasun lorpenek:

ziegako itzaletatik irtetea,

itotzen zioten esku horietatik ihes egitea,

bizitzeko gogoak berreskuratzea,

erabakitzeko gaitasuna bereganatzea,

urteetan tristeziak bahitua izan duena

berriz poztasunak besarkatzea,

Eta injustiziaz beteriko mundu honetan

esklabotzatik irten diren

pertsonen garaipenen

      eta abar

          oso

             luze

                bat.

Akaso,

ez gara nik pentsatu bezain egoistak,

apika

ez gara hain maltzurrak,

eta agian

askatasuna ez da kontzeptu indibidual bat,

baliteke

kontzeptu kolektiboa izatea.

Suposizioak baino ez dira,

amesteko askatasuna behintzat

ez diezagutela kendu.

               Eider Gorritxategi
               Durangon, 2019ko maiatzaren 10ean