Lehenik Euskadi

Erabiltzailearen aurpegia Goiztidi Diaz Basterra (EAJ) 2015ko abe. 11a, 08:30

Ez naz, ba, galduko bide bazterretan. Ez. Gaurkoan, irakurle estimatua, artez joko dot, eta zuzenean zure botoa eskatuko deutsut EAJ-PNVren alde. Badakigu, jakin be, aurrean daukaguzala Gorte Orokorrak aukeratzeko Hauteskundeak. Hau da, Madrilen gure ordezkariak nortzuk izango diren eta berauek gure nahien defentsa zelan egingo daben erabakitzeko abagunea izango dogu.

Nik neuk ez daukat zalantzarik: EAJk hainbat eta hainbat urte emon ditu Euskadiren defentsan, gure artean eta gure mugetatik hartarago, bai Bruselan, bai Madrilen, bai eta gure nortasun nazionalak eta gure beharrek babesa behar izan daben toki guztietan ere. Mundu zabalean. II. Errepublikan eta Frankismoan, erbestean, klandestinitatean eta Demokrazian. Beti. Edonon. Ezker Abertzaleak hauteskunde orokorrak boikoteatu eta gu, hauteskunde orokorretan parte hartzearren, “espainolistak” ginela aldarrikatzen ebanean be egon ginen. Ondo etorriak, bide batez, bide honetara. Bazan garaia!

Garai batzuetan, gure ordezkaritza sendoa izan danean, Euskadiko autogobernua indartzeko akordioak lortu izan ditugu. Beste batzuetan, aurrerapausoak lortzea baino, gure eskubideekin atzerapausorik ez egotea izan da ordezkarion lanik handiena. Baina hantxe egon dira, gau eta egun buru-belarri lanean Euskadiren alde. Euskadi, abiapuntua eta helburua. Lehenik Euskadi.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!