Helduentzako ipuin kontaketa saioa

Bizenta Mogel Bibliotekak eta Durangoko Udaleko Inmigrazio sailak elkarlanean "Bideak gurutzatuz: gure komunitatea osotzen duten migrazio arloko bizi istorioak” izenburupean, azaroan, egitarau bat abiatuko dugu pertsonen arteko elkarrizketa, elkar-topaketa eta esperientzien trukaketa sustatzeko jarduerekin. Egitasmoa Giza Bilbiotekaren inguruan egituratuko da; bertan, hainbat jatorritako pertsonek parte hartuko dute. Oso bizipen desberdinak dituzten pertsonak izango dira, baina komunean kontu bat daukatenak: migrazioa. Programatutako ekintzak azaroaren 17an hasiko dira, helduentzako ipuin-kontaketa saio batekin, Cecilia Paganiniren eskutik. “Puntos cardinales: catálogos de viajes vitales” izango da saioaren izena, eta Paganiniren laguntzarekin, humanitatearen historian zehar ibilbide bat egingo dugu; Homo Erectusek Afrikatik egindako lehen bidaia hartatik gaur egungo migrazioetara; Paganini gizakiak subjektu migratzaile gisa duen esentziara hurreratuko da. Ipuin-kontalariak bidaia emozional eta geografikoa proposatuko digu, inpresioen biltegietatik, ibilitako bide baten arima eta oroitzapenetatik. Tangoari lapurtutako migrantearen hitzak erabiliko ditu.