Proiektu honek ez du soilik lokal berri bat esan nahi. Etorkizunera begira egindako apustua da. Modalitate berriak gehituko ditugu, ordutegia zabalduko dugu eta gero eta pertsona gehiagori arte martzialak ezagutzeko eta praktikatzeko aukera eskaini nahi diegu. Gure helburua argia da: kirol hau hazten jarraitzea eta komunitate sendo bat eraikitzea.
Hazkunde horren isla izan zen joan den zapatuan jokatutako Elorrioko Kickboxing Openaren bosgarren edizioa ere. Hogei klub inguru elkartu ziren, 203 parte-hartzailerekin, eta hiru tatamitan banatutako jardunaldi bizi eta ikusgarria izan genuen goiz osoan zehar. Gainera, amaieran sorpresa hunkigarria bizi izan genuen: Laureano Lara tatamira igo zen borrokaldi bat egitera. Une ikusgarria izan zen, baina batez ere emozioz betea, bertan geunden guztiok gogoratuko dugun horietakoa.
Horrelako ekitaldi bat aurrera ateratzea ezinezkoa litzateke antolakuntzan ibili ziren pertsona guztien lanik gabe. Zorionak eta mila esker denei; onenak zarete.
Azken finean, gimnasio berriaren irekierak eta Elorrioko Openak norabide bera dute: kickboxingari eta arte martzialei bultzada ematea. Horretan sinesten dugu, eta horretan jarraituko dugu lanean.