Benetan sentitzen dugu Durangoko langile bat erasotua denean, eraso hori kolektibo oso batek pairatzen duela. Eta EH Bildun kolektibo horren parte sentitzen gara. Hasierako ezintasuna, ordea, ekimen politikoan bihurtu nahi dugu. Errazena litzateke salaketa publikoa egin eta argazkia ateratzea. Baina argazkian egoteaz gain, elkartasuna adierazteaz gain, bidearen zirrikitu gehiago ibiliko ditugu.
Badago eragiterik Gran Hoteleko enpresariak udaletik presionatzeko, langileen eskubideak errespetatuak izan daitezen. Demagun udalak ekitaldiak antolatzeko lekuen zerrendatik Gran Hotela ezabatu arazten dugula; demagun udaleko bazkari ofizial gehiagorik ez dela bertan egiten; demagun udalak argitaratzen duen Komertzio Gidan eta Turismo Gidatik hotelaren informazioa ezabatzen dugula; demagun turismo bulegoak ematen duen informaziotik beste hotelak lehenestea gomendatzen dugula. Badago, argazkitik harago, zer egin, badago erakunde moduan nola eragin.
“Laissez faire” famatuak (egiten uzteak) eta “justiziak epaitu dezala” batzuek defendatuko duten argudioak ez du beti balio. Ez behintzat guretzat. Botere posizioetan daudenak injustuki erasotu dute gure moduko langile bat. Horren aurrean, argazkietatik harago, hitzetatik harago, ekintzak.