Testuinguru horretan, udalak bigarren mailako erakundeak ziren, administrazio orokorraren eta aldundien azpitik. Eta noski, erabaki ahalmena eduki barik zerbitzuen finantziazioa erabakitzen den organoetan. Herritarrengandik hurbilenak, baina erabaki garrantzitsuetatik kanpo.
Datorren hilabetean Gasteizko legebiltzarrean onartuko den tokiko erakundeen legearekin, udalei adin-nagusitasuna aitortuko zaie, eskumen esparru propio batekin, zuzenean edo amankomunean garatu ahal izango dituzten eskumenekin. Baliabide ekonomikoen banaketa egiterakoan ere ahotsa eta erabaki ahalmena izango dute.
Horrekin konponduko dira udalek dituzten arazoak? Ziurrenik ez. Baina inork ez du zalantzan jarriko udalek ematen dituzten zerbitzuak. Beste erakunde batzuk ezin izango dira udalen eskumenak “zapaltzera” etorri, eta horrez gain, zerbitzu horiek finantziazio nahikoa izango dute. Beraz, laster, herritarrei era eraginkor batean zerbitzuak eskaintzeko beste tresna baliagarri bat edukiko dugu. 35 urteren ondoren, herriekin, herritarrekin pendiente geneukan zor bat kitatuko dugu.