Bigarren argazkia orain dela bi astekoa da, lehenengo argazkitik zortzi urte pasa diren honetakoa. Gaur egungo Durangoko alkatea agertzen da. Atzean tailer zaharrak agertzen dira, eta alboan makina-hondeatzaile bat.
Dirudienez, bere garaian saldutako proiektu megalomano hura, zortzi urte beranduago, tailer batzuen eraispen hutsean geratuko da. Momentuz. Momentuz diot, paperean behintzat, oraindik onartuta dagoelako adreiluaren mozkorraldian diseinatutako proiektu hura, eta batzuek ez dute betiko baztertu nahi. Adreiluaren burbuilaren garaietara itzuliko garela uste dute…
Zortzi urte pasa dira, baina komunean gauza bi dituzte argazki biek: batetik, alkate jeltzalea; bestetik, bai lehen eta bai orain, durangarroi ez digutela galdetuko zer egingo genukeen Durangoko etorkizuneko garapen urbanistikoa planifikatzeko orduan, hartu behar dugun erabaki garrantzitsuenean.