2007tik ordenantza honek eraikuntza jasangarria sustatu du eta garai aldakorrak gizarte-erronka berriei aurre egitea dakar. Une honetan kontsulta publikoan dagoen egokitzapenak, esaterako, energia-eraginkortasuna eta isuriak hobetzeaz gain, etxebizitzen eta hiri-espazioen diseinuan genero-ikuspegia sartzea indartzen du.
Emakumeek, zaurgarrienek bereziki, pairatzen dituzte gehien energia-pobreziaren eta etxebizitza duinerako sarbide ezaren ondorioak. Horregatik, etxebizitza irisgarri, seguru eta pertsona guztien beharretara egokituak direla bermatzea dugu helburu.
EAJ/PNVtik, ingurumen-iraunkortasuna eta justizia sozialaren alde egiten dugu. Erreforma hau aukera aparta da genero berdintasuna politika publikoetan, batez ere gure espazioen diseinuan, txertatzeko.
M8a ez da egun sinboliko hutsa; bizitzako esparru guztietan berdintasunaren aldeko, etengabeko, konpromisoa da. Durangon, hitzetatik ekintzetara jarraitzen dugu, aukera berdintasunaren aldeko bidea egunerokoa delako.