DRT-ko tabernan zegoen neska talde batek irain fisiko eta psikologikoak jasan zituen Baionako jokalarien partetik. Nesken salaketaren ostean, Durangoko taldeak lapurtarrekin harremana etetea eta gertatutakoa salatzea adostu zuen. Baionak, ostera, bere jokalariak defendatzeko erabaki nazkagarria hartu zuen, erasoaren fidagarritasuna zalantzan jarriz.
Tamalez, Erdi Aroan jarraitzen dute askok. Erasoen aurkako protokoloak edo berdintasuna bultzatzeko ekintzak oso urriak baitira. Erasoak, zoritxarrez, oraindik ere edonon gertatzen dira; ezberdintasun bakarra da, hemen, emakumeak salatzeko beldurra galduz doazela. Beharbada, beste leku batzuetan, erasotzaileak babesten jarraitzen duten bitartean, emakumeek beldurra izaten jarraituko dute. Hori uxatu beharra dago, eta salaketa da bidea.
Idazteko bi arau baino ez zirela behar zioen Oscar Wildek: idazteko zeozer izatea, eta esatea. Eraso sexistekin ere berdina gertatzen da. Erasoa gertatzen denean, esateko pausoa ematea funtsezkoa da. Beldurra alde batera utzi, eta erasoak salatu beharko lirateke. Hauxe da bidea. Ez dituzte isilduko, eta kasu batzuetan gertatzen ez den bezala, erasotzaileak ez du babesik izango. Ez daude bakarrik!