Joan den astean Topaguneak –Euskal Eskola Publikoaren aldeko Plataformak– Durangon egin du bere azken bilera. Bertan Euskal Herriko hainbat sindikatu, guraso elkarte eta plataformak hezkuntza sistemaren egoera aztertu zuten, eta baita datozen hilabeteetarako erronkak zeintzuk diren zehaztu ere. Garrantzitsua da honelako talde batek Durango aukeratu izana. Izan ere, gure herrian hezkuntza pribatu-kontzertatuak inguruan baino pisu askoz handiagoa du, hala ikastetxe nola ikasle kopuruari dagokionez, eta horrek ez du Durango leku oso onean uzten. Aurrerakoia eta denontzako berdina beharko lukeen udalerriak klasista itxura ematen duelako. Etorkizunean eskola publikoak esparru gero eta zabalagoa eskuratu beharko luke gure eskualdean ere. Hori gertatzea geu guztion esku dago.
Honegatik guztiagatik, babestu dezagun Euskal Eskola Publikoa. Has gaitezen babesa erakusten Ordizian ekainaren 2an eta egin dezagun publikoaren aldeko benetako apustua matrikulazio garaian ere. Bete ditzagun ikastetxe publikoak.