Urte batean kabitzen da bizitza oso bat, Maddirena. Kabitzen dira Troitiri emandako bi muxuak eta kabitzen dira sei bis Martutenen. Kabitzen da Getarirekin mundu berri bat eta kabitzen dira heriotza bi Patagonian. Kabitzen da auto istripu bat Zumaian eta tiroketa matxista bat Orion. Urtebetean kabitzen dira 20.000 erailketa palestinar herrian, eta kabitzen dira Larrano, Udalatx eta Anboto. Kabitzen da Greba Feminista Orokor bat eta kabitzen da 6.000 €-ko gastua alokairuan. Kabitzen dira milaka pertsona Txoria Txori herriari kantatzen eta kabitzen da faxismoa Durangoko Udalean.
Egunkarietako orrialdeak bete dituzte hauetako zenbait gertakizunek; beste batzuek, ez. Kontatzen ez dena, gertatu da? Izena duena bada; eta gertatzen dena ere bai. Tabernan eta autobusetan gaudela diote. Manifetan, kontzertuetan, kartzeletan, izaretan, izarretan eta Fitz Roy-n ere bai.