EH Bilduk eta Herriaren Eskubideak bira garrantzitsua eman dute. Eraikinik gabeko birika berde bat defendatzetik, altuera jaistera igaro dira, Durangoko EAJn planteatzen genuenaren ildotik.
Horretarako, azkenean, negoziatzeko bidean sartu da. Horregatik pozten gara, aurrerapausoa da. Dirudienez, aurreakordioa lortu du eta parte-hartze prozesu bat dago, baina zinegotziok ez dugu horri buruzko inolako informaziorik jaso. Agian lortutako aurreakordioa ez da hain ona?
Erakusketara joan gara, informazio horren bila. Eta, egia esan, bertan ere ez dugu informazio argirik aurkitu. Zein da Durangok aurreakordio horrekin bere gain hartzen duen benetako kostua? Zein da Udalak Eusko Jaurlaritzari lagatzen dizkion BOEen, lursailen eta eraikinen kopuru zehatza eta zein da horien kuantifikazio ekonomikoa? Zenbat jaisten dira altuerak eta zenbat handitzen da berdegunea trukean? Zergatik egiten zaio uko BEPBan udalaz gaindiko proiektu estrategiko bat izateko aukerari? Zer gertatzen da durangarren zati handi batek aurreakordioaren baldintzak baztertzen baditu edo beste aukera bat bermatzen badu?
Oraingoz dena da zalantza eta itzala.