Ideia horri bueltaka nabilela, Espainiako Auzitegi Konstituzionaletik etorritako azken epaiaren berri izan dut. Oraingoan ezeztatu egin du EAEko udalen legeak euskara hutsean jardun ahal izateko ematen duen eskumena. Zer eta “oreka linguistikoa” urratzen duelako! Epai hau dator euskararen erabileraren eta normalizazioaren kontra ebatzi diren beste askoren segidan. Ezbairik gabe, oldarraldi judizial baten aurrean gaude, non euskaldunen hizkuntza eskubideak jomugan dauden. Gainera, okerrera egiteko arrisku handia dago. Ikustea besterik ez dago maiatzaren 28ko hauteskundeen ostean Espainiako eskuinak hartu dituen lehen neurrietako batzuk gaztelaniaren aldeko eta estatuko hizkuntza gutxituen aurkakoak izan direla.
Ez datoz garai onak berdintasunaren alde sinisten dugunontzat, baina gure esku dago giharra erakutsi, eta datozen urraketei STOP esateko. Tourrean egin dugun moduan egingo al dugu, orain, gure hizkuntzaren defentsan?