Kalea eta euskara

Erabiltzailearen aurpegia

Soziolinguistika Klusterrak kaleratu berri ditu 2021eko hizkuntzen kale erabileraren datuak, eta askotariko balorazioak etorri dira datu horien aurkezpen ondotik. Lerroburu nagusia izan da azken bost urteotan ez dela apenas gorabeherarik izan euskararen kale erabileran orokorrean. Nik, aitortu behar dut, datu eskasagoak espero nituen. Izan ere, iruditzen zait ni mugitzen naizen kaleetan euskara gero eta gutxiago entzuten dela. Hortaz, argi geratu da irudipenetatik harago, ikerketa behar dela; eta, errealitatean oinarrituta, neurriak hartu behar dira euskararen erabileran jauzi kualitatiboa emateko.

Halaber, poztekoak dira Durangaldeko datuak, non erabilerak %5eko hazkundea izan duen azken 11 urteetan. Hala ere, uste dut ezin garela konformatu emaitza hauekin. Edozein momentuan joera aldaketa gerta daiteke. Mundu globalizatu batean bizi gara, eta ikaragarria da hizkuntza handiek duten indarra.

Horren aurrean indarra egiteko, badugu oraindik euskararen erabilerak busti behar dituen eremu estrategiko asko: hiriburuak, goi-kultura zentroak, lan-mundua, finantza eta negozio arloa, esaterako. Gune horietan ere euskara entzutea giltzarria da. Gune horietara hurbilduko dira egun haur eta gazte direnak. Eutsiko diote euskarari? Haur eta gazte horiek badute gaitasun nahikorik euskaraz erraz eta eroso aritzeko?

Galdera horiei eta beste batzuei erantzun beharko diegu guztion artean. Testuingurua ondo ulertzea eta aurrera zelan egin ondo asmatzea dugu erronka, eta hori guztia benetako elkarlanean eta lankidetzan eginez gero, seguru nago gero eta euskara gehiago entzungo dudala mugitzen naizen kaleetan!

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!