Halaber, aurreko zapatuan Donostian gazteen eskutik etorritako manifestazioan milaka izan ziren euskararen alde bildutakoak, deialdiaren atzean mezu positiboa egon da, zerbaiten alde eta ez ezeren kontra. Esango nuke zapatuko hitzorduak ekarri duela haize freskoa: euskararen erabilera gazteen artean sustatzeko deia gazteek beraiek eginda, eta ez helduok geure pulpitotik esandakoari jarraituta. Sarritan esaten da gazteen artean euskararen erabilera eskasa dela. Nik beste modu batean ikusten dut afera: gazteen artean ematen den erabilera ez dator bat ezagutzarekin alderatuz gero. Helduen kasuan gertatzen den antzera. Hortaz, ez dezagun gazteen bizkar gainean utzi euskararen erabileraren zama.
Amaitzeko, balio beza manifestazioak dena euskararen alde jartzeko: euskararen aldeko jaiak eta hizkuntza ohiturak aldatzeko ariketa sozialak indartzeko; ume, gazte zein helduen artean euskarak behar duen bultzada eta prestigioa eskuratzeko. Finean, sinistu dezagun euskara ez dela daukagun zerbait, gu garen zerbait baizik.