Astxikiko gazteluaren erreprodukzioa ikusi nuen aurrekoan Anbotoren webgunean. Nafarroako erresumaren babesleku izana, bagenekiena irudiz jantzi du proiektu horrek, baina zelako balioa duen geure begiekin ikusi ahal izateak. Baginen eta bagara. Geroztik ez diot berdin begiratzen Astxiki mendiari.
Eta, Astxiki eta Alluitzen arteko magalean, Artolako lepoan, indusketak egiten ibili dira Burdin Aroan herri harresiturik egon ote zen aztertzeko. Gure historiara lotzen gaituzten aztarna gehiago.
Gaur, kaletik nabilela, etxe altuen arteko hutsunetik Astxikiko mendi punta agertu da; beti hor, gure zaindari izango balitz bezala. Une batez geratu, lasai erreparatu, eta han goian arrano bat hegan dabilela iruditu zait.