Istiluak

Erabiltzailearen aurpegia

Asteon hil da Michael K. Williams, Chalky White (Boardwalk Empire) eta Omar Little (The Wire) ahaztezinak gorpuztu zituen aktorea. Ni ere bere klanekoa nintzen Atlantic Cityn, bere bandakoa Baltimorren. Arima beltza, errebeldia. Akordatu naiz Omar Littlek Baltimorreko kale ilunetan bere eskopetagaz eta txistua jotzen agertzen zen bakoitzean sortzen zidan zirraraz. Asteon zerbait akatu du Omarrek nire barnean.

Gogoratu naiz Baltimorreko banden arteko borrokez, polizia agertzen zenean sortzen ziren istiluez. Eta, hedabideei erreparatuta, badirudi gu ere azkenaldian hantxe bizi garela. "Elorrion sei gazte atxilotu ditu bart gauez Ertzaintzak, desordena publikoa egotzita", zioen irratiko lehen titularrak zapatu goizean. Botelloia egiten ari omen ziren gazteak, eta polizia agertzean hasi ei ziren istiluak. Beraz, nork piztu zituen istiluak? Esan behar dut zaintzearen eta txertoaren alde nagoela. Baina, nire ustez ez du zentzurik egunez terrazetan lasai egin daitekeena gauez aire librean ezin egin izateak. Are gutxiago polizia bidaltzeak. Ni ere, segurutik hantxe nengoke, oraintxe hogei urte banitu.

"Bingen Zupiriak Elorrioko istiluak salatu ditu, eta uste du antolatutako zerbaiten aurrean egon gaitezkeela", zioen domekan irratiak. Hara, falta zena. Eta, pentsatu dut, ez ote den guztia aurrez idatzitako gidoi bat, telesail baten erakoa, pandemiaren gestioan, Zaldibarko zabortegian zein Osakidetzako oposaketetan duten arduraz berbarik egin ez dadin.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.