Durangoko PPko zinegotziak EH Bilduren ilegalizazioa eskatu du. Ez da eskari hori egin duen lehen politikaria izan, VOX alderdiak, Aznarrek edo Madrileko presidenteak ere egin dute lehenago. Eskuin muturra ofentsiba betean dator eta ekidistantziek ez dute balio. Aukeratzeko ordua da. Alde batetik bestera saltoka ibili denari ere arrakala handitzen ari zaio, jada ez da posible hanka bat faxistek eta bestea demokratek eutsita mantentzea. Mugimendu politiko guztiek berandu baino lehen aukeratu beharko dute zein den bere bidea, baita EAJk ere. Izan ere, gobernuan mantentzeko, badakigu eskuin muturraren babesa ez dela doakoa.
Bitartean, ozen esango dugu Euskal Herrian posible dela. Posible dela berdinen arteko herri bat eraikitzea. Bidegurutzean gaudela baina badagoela esperantzarako tartea. Angela Davisek erakutsi bezala, esperantza diziplina bat delako. Horregatik, bide hau gurekin batera egin nahi duen pertsona oro gonbidatzen dugu zapatu honetan Bilbon egingo dugun mobilizaziora. Faxismoak ez du tokirik hemen, askatasun haizea gara.