Eta, zentzu honetan, ligako partida baldintzatuaren ondoren, harritzekoa iruditu zitzaidan Luis Enrike, prentsa agerraldian inork epaileari buruzko galderarik egin ez zionean, oso arduratua egotea epailearen izendapenarekin. Izan ere, epaile honekin, Espanyolen aurkako kanporaketa aise gainditu ondoren, eta ligako 11 partidetatik 9 irabazi eta 2 berdinketa lorturik, zeren beldur zen?
Egia esan, Athleticentzat egoera honek badu irakurketa positiboa, munduko talderik indartsuenak horrelako trikimailuetara jo behar duenean, errespetatzen zaituen seinale izan ohi delako. Hori bai, errespetua zelai barruan irabazi behar da, iraganeko lorpenetan lagundurik eta aukera berrietan neurria emanez. Beraz, izan dezagun konfiantza talde honetan, oraindik aukera baitago kanporaketari buelta emateko.