Arrazoiz jaiegunen antolamendu honi eustea zaila da, oso. Hala, makineria instituzionalak prestatutako Elkano marka irentsi dugu. Agian, euskaldunok ez dakigu gure lorpenak saltzen; erreferente bat lehiatu nahi diogu Espainiari itsuan, iraunarazten gabiltzanari arretarik eskaini gabe.
Errege bati gorazarre egitetik, bizirik heldu ziren Espainiako Enperadorearen agindupeko gizonak goraipatzera pasatu gara. Gainera, erakunde denek erosi dute bertsio akritikoa. Akaso, Elkanoren teilatua hautatzen okertu gara eta erosoegia da eraiki dugun etxea. Kontua da espazio publikoan altxatu dugula, eta hori etorkizunerako nahi dugunaren isla da.
Gure historia berridazteko hainbat ahalegin loratzen dabiltza. Hala ere, nahiz eta errelatoa guk idatzi, mundu hobe bat proiektatu nahi badugu, erreferenteak tentuz aukeratu behar ditugu. Gauza bat da euskaldunei nabigatzea ahalbidetu zien trebetasuna eta industria goraipatzea. Beste gauza bat da herrialde baten enbaxadore bihurtzen saiatzea asmo inperialen lagun bat.
Artean, nire urteguna jaiegun bihurtzen saiatuko naiz, arrazoizko atsedenerako ez zait besterik okurritzen eta.