Durangoko Udalak hitzarmen bat du Medicusmundirekin, eta hitzarmen horretan, Aliantza zentroa laguntzen dugu (Aliantza Guatemalako aterpetxe bat da, eta bertan salerosketaren, bortxaketen edo indarkeriaren biktima izan diren neska gazteei ostatua, babesa, prebentzioa eta justiziarako sarbidea ematen zaizkie). Medicusmundiren hitzarmenak badu sentsibilizaziorako beste alderdi bat. Sentsibilizazio hori gauzatzeko lehiaketa bat antolatu zen, non Durangoko 4 laguneko taldeek hainbat proba egin behar izan zituzten, Guatemala eta osasuna gai hartuta. Talde irabazleak Guatemalako errealitatea bertatik bertara ezagutzeko aukera izan zuen. Politikarioi joateko aukera eman zitzaigun (gastuak geure gain hartuz) eta nik ez nuen bi aldiz pentsatu.
Medicusmundiri esker, Guatemalako errealitatea ezagutzeko aukera izan dugu. Herrialde horretan, jendea gosez hiltzen da : 5 urtetik beherako haurren %50ek baino gehiagok desnutrizioa pairatzen du, eta horrek erabateko asimetria soziala eragiten du. Herrialde horretan, biztanleriaren erdia indigena da, eta bigarren mailako biztanleak balira bezala tratatzen dituzte, %70 nekazariak dira, eta, gainera, horietako asko edateko urik eta argi elektrikorik gabe bizi dira. Bertako gazteen ametsa bizitza hobe baten bila emigratu ahal izatea da.
Bidaia horretan konturatzen zara zer behar dauden, zein zorionekoak garen, errealitatea uste baino okerragoa dela eta desberdintasunari aurre egitea dela oraindik daukagun erronka nagusiena.
