Hori definitzen duen proiektu zehatzik ez dagoenez, birmoldaketaren balorazioaren aurrekontua 1,12 milioi eurokoa izango da. Txosten teknikoak dioenez, eraikin hau balio historikorik eta arkitektonikorik gabea izateaz gain, antolamenduz kanpo dago eta ez dator bat Alde Zaharreko gainerakoarekin.
Egoera horren aurrean, PSEren proposamena, beti defendatu dugun bezala, eraikina eraistea da. 1,12 milioi euro horiekin, lehentasunezkotzat jotzen ditugun auzo-eskaerei aurre egitea proposatzen dugu, hala nola Alde Zaharreko lurzoru labainkorra hobetzea, Antso Estegiz kalea berriztatzea eta San Faustoko Kapitanena baserria eraberritzea. Gure herrian baditugu beren historia, arkitektura eta antolaketagatik mantendu behar ditugun eraikinak; esaterako, Garai Jauregia edo Murueta Torre etxea.
Benetan hau al da gobernu taldearentzat eraberritzeak lehentasuna duen eraikina? Edo, zerbait egingo dela dirudien lasterketa bat da, jakinda azkenean ez dela egingo? Denborak esango du