Porrotaren apologia

Martxoaren 8ak kutsatuta, erretorika berarekin nator ni ere, azken egunotan irakurri, entzun eta ikusi ditudan asko hausnarketarakoak iruditu baitzaizkit. Egia da sumatu dudala –edo sumatu nahi izan dudala– emakume sortzaileak euren lekua hartzen ari direla kulturan, eta etengabe ari direla lanean, pauso txikiak ematen, oraindik egiteko asko badago ere. Bertsolaritzan azken hamarkadetan aurreratu dena eredugarri iruditzen zait, eta beharrezkoa arlo honetan egin den lanketa beste diziplina batzuetara zabaltzea. Asko dira aldatzeko asmotan lanean ari direnak; musika gida morea, adibidez, ezinbesteko erreminta izango zaigu gutxi barru, eta, bide batez, Euskal Herrian zenbat emakume musikari dugun erakutsiz lezio bat emango digu. Horietako batzuk izan dira duela aste batzuk elkartu, eta harremanak sendotu eta lanerako indartsu daudela erakutsi digutenak.