Bi urteko ibili honetan, asko eta askotarikoak izan dira zutabeetarako hautatu ditudan mintzagaiak. Mintzagai horiei begira jarriz sortu zaizkidan pozez eta, batez ere, kezkez hausnartzen eta horiek guztiak testu bakoitzean egoki josten saiatu naiz, baita beren bidez irakurleari gogoetarako bide bat zabaltzen ere. Errutina deitzen dioten eguneroko sorgin-gurpilean horretarako tartea ere falta baitugu: pentsatzeko, hausnartzeko denbora.
Baina bide horretan albora egitea tokatzen zait orain, lan instituzionala eta astekari bateko zutabegintza ez baitira bateragarriak askoren begietara; ez dadin interes desberdinen arteko talkarik egon, inork ez ditzan hedabide bikain honen izena eta izana zalantzan jar.
Lekunberriko musika talde batek honakoa abesten zuen: “Hasi eta bukatu egiten diren gauzen multzo horretan dago maitasuna”. Bada, nik maitasuna ez, baina maitasunez gordeko dut motxila horretan Anboton zutabegile lez jardun dudan garai hau; herri eginez.
Mila esker eta beste bat arte, irakurle.