Alor gramatikalari dagokionez, jolastu aditza beti NOR kasuan erabili behar da; alegia, “umeak txin-txaunetan jolastu DIRA”. Eta, horrez gain, jolastuk adiera edo zentzu ludikoa du, atsegin hartzeari lotuta doana. Aldiz, jokatuk joko batean aritzeari egiten dio erreferentzia. Ez dakit bata bestearekin nahaste horrek hizkuntzaren erabilerarekin soilik duen zerikusia, edo hizkuntzaz haragoko hausnarketa bat egin beharko genukeen.
Gero eta lehiakorragoa den gizarte eredu batean bizi gara, ondo pasatzea baino, elkarren arteko indarrak neurtzea eta garaile ateratzea garrantzitsuagoak diren batean. Umeak helduak balira lez hartzen dira, eta herriko plazara joan ordez, futbol-zelai, frontoi, igerileku eta abarretara doaz, entrenatzera. Etorkizuneko profesionalak guraso gaixoen, ez gizajoen, begietan.
Ez ditzagun jolastokiak joko zelai bihurtu, ezta umeak heldu ere. Jolas daitezela gau eta egun, irribarre bat ahoan dutela, harik eta jokoak bere atzaparretan hartzen dituen arte.