Foro horiek kudeatzeko, udalak Prospektiker enpresa azpikontratatu du. Eta, herriko elkarte eta norbanakoek bertan parte hartzeko gonbidapena horiek egin zuten, posta elektronikoz edo zuzenean telefonoz deituta. Azken mezu elektronikoak gaztelania hutsean bidali zituzten, “kaixo” eta “agur bero bat” ustez adeitsuak salbu. Gainera, telefonoz zuzentzerakoan ere gaztelaniaz egin zioten bati baino gehiagori. Hori gutxi balitz bezala, foroa bera ere gaztelaniaz izan zen hasierako protokolozko agurrak gorabehera. Ondorioz, hainbat herritar eta elkarteren haserrea agerikoa izan da.
Herritar eta elkarteoi gaztelania hutsean zuzenduz enpresak izandako jokabidea eta hizkuntza-hautua lotsagarriak izan dira, baina ez da ahaztu behar Udalak duen erantzukizuna.
Euskararen udal araudia ez betetzea errazegia da enpresentzat. Hizkuntza-irizpideak aurrez exijitu behar dira kontratuan bertan, eta, gero, horien betetze-mailaren jarraipena egin. Udalak arduraz jokatu beharko luke eta diru publikoarekin antolatutako ekintza guztietan hizkuntza-irizpideak zaindu.
Espero dugu aurrerantzean Udalak euskararen udal araudia, euskara plana eta abar betetzea, eta euskara lehenetsiko duen hizkuntza-politikari bide ematea. Ez bakarrik berbaz, ekinean baizik. Norabide horretan, gu ere bidelagun izango gaitu.