Esperientzia honekin, gizarte-azpiegituren beharraz eta garrantziaz hitz egiten digu Klinenbergek. Kasurako, bibliotekek komunitatearentzat betetzen duten funtsezko zeregina nabarmentzen du; hezkuntzarako zein norberaren garapenerako baliabideetarako sarbidea emateaz gain, pertsonek kultura-jardueretan, ekitaldietan eta gizarte-programetan parte hartzeko lekua ere bada.
Bizenta Mogel biblioteka herritarren parte-hartzea sustatzeko bizi-eremu gisa erakutsi nahi dugu; denetariko pertsonak biltzea, ezagutzak eta esperientziak partekatzea eta komunitate-loturak indartzea dira gure helburuak. Gainera, udaleko beste zerbitzuekin elkarlanean, biztanleen askotariko beharrei erantzuteko zerbitzuak eta programak eskaintzen ditugu, ekitatea eta hezkuntza- eta kultura-baliabideetarako berdintasunezko sarbidea sustatuz.
Bibliotekak “herritarrentzako jauregiak” dira: komunitatearen gizarte-egituraren osagai integralak diren heinean, gizarte kohesionatuagoa eta erresilienteagoa garatzen lagunduko dute.