Hondakinen inguruko foroa eratzeko apustua EH Bildutik egin genuen. Gugandik etorri zen iniziatiba eta proposamena. EAJgatik balitz, bosgarren edukiontzia ezarriko ziguten inoren oniritzia kontuan hartu gabe. Foro horretan hainbat esperientzia ezagutu, datuak ikusi, eta bideragarriena den sistema baten alde egiteko aukera izango dugu herritarrok, beraz, ezin dugu aukera galdu. Hainbat bilketa sistema daude, baina garrantzitsuena helburu egokia jartzea eta helmuga horretara heltzeko bidea ondo egitea da.
Eztabaidatu, nahi duzuena esan… baina erabakia hartuta dago. Bosgarren edukiontziaren alde egingo du EAJk, aurreko astean argi utzi zigun moduan. Guzti hori birziklatzeko helburuak zeintzuk izan behar diren argitu barik, eta beste sistema batzuk baloratu barik. Beraz, EAJren inposaketa baten aurrean aurkitu ez gaitezen goazen denon artean erabakitzera zein sistema den eraginkorrena, helburu onenak lortzen dituena eta gure ingurumena gehien zainduko duena. Horregatik, guztion parte-hartzea beharrezkoa da gure herrian etorkizunean egingo den hondakinen bilketa erabakitzeko.