Egun, udaletxearen arkupeko goialdetik galtzen da gehienbat berotasuna, adituek jakinarazi dietenez. Gune hori material egokiekin isolatuta, beroak luzaroago iraungo luke. Udaletxeko leihoak geruza bikoitzekoak dira, baina markoetatik joaten da beroa. Ildo horretako diru-laguntzak noiz irtengo zain daude eskaria egiteko.
Beraz, beroa ez galtzea da eraikina energetikoki eraginkorrago bihurtzeko modu bat. Baina, beroa sortzeko moduak ere zeresan handia dauka. Biomasa bidezko berokuntza-sistema zentrala jartzeko proiektua jaso dute dagoeneko. Aukera hori ekonomikoki bideragarria zaien jakiteko, diru-laguntza eskaerak egingo dituzte, eta ondoren erabakiko dute.
Udaletxearen atzeko aldean jarriko lukete galdara, hezetasunetik babestuko lukeen etxola baten barruan. Ohiko pellets materiala erosi beharrean, galdara berotzeko materiala udalaren jabetzako basoetan egindako entresaketatik ateratzea litzateke aukeretako bat.
Udal eraikinetako gela denetara ez ezik, pilotalekuko dutxetara ere helduko litzateke berokuntza-sistema zentrala.