Eguraldi kaskarrari aurre egin, eta jende asko hurreratu zen joan zen zapatuan Gaztardogi azokara. Omenaldi bat ere izan zen tartean. Izurtzako emakumeek Ana Mari Piedra durangarra omendu zuten. Piedra Gurutze Gorriko kide izana da, eta, 1980ko hamarkadan, bere laguntzari eta bitartekaritzari esker hainbat hitzaldi eta ekimen egin zituzten Izurtzan: besteak beste, lehen sorospenari, droga-mendekotasunari eta herentziarako aukerei buruzko ikastaroak antolatu zituzten. Oroigarri bat eta lore sorta bat jaso zituen Piedrak joan zen zapatuan, azoka baliatuta.
Beste omendu batzuk ere izan dira asteon. Astelehenean, Erdoitzako Ama jubilatuen elkarteak Azkonizaga jatetxean egindako bazkarian, Mari Tere Irastorza omendu zuten, urtetan batzordean egindako lanagatik. Beragaz batera beste jubilatu bi ere omendu zituzten, urteroko ohiturari eutsita: Rafael Ajuria eta Mari Angeles Gorrotxategi.