Aldundiaren diru-laguntzaren esperoan daude.
Nork bere etxean konposta egiteko aukera eskaini gura du udalak. Horretarako, diru-laguntza eskatu du Bizkaiko Foru Aldundian, eta hile biko epean erantzungo dio. Udalak laguntza jasotzen badu, konposta egiteko 25 ontzi erosiko dituzte, eta interesa erakutsi duten herritarren artean banatu.
Ontzi bat gura duenak, udaletxera joan besterik ez dauka, eta interesa agertu. Herritarrek ez dute ontziengatik ezer gehiago ordaindu beharko.
Bere sasoian Azterlanek hondakinen berrerabilpenerako programa landu zuen udalarentzat eta, ondorioz, teknologia-zentroak egingo du bitartekari lana. Azterlan arduratuko da konposta zelan egin irakasteko ikastaroak antolatzeaz, dudak argitzeaz nahiz jarraipena egiteaz.
Programa ekainean edo uztailean martxan ipintzea gura dute, diru-laguntza jaso eta berehala. Arrakasta badu hurrengo urterako ontzi gehiago lortzen saiatuko dira.