Aurreko legegintzaldian legez, bost batzorde mantentzea onartu zuten udaleko ordezkariek.
Bildu alderdiko gobernu taldeak egindako proposamenek egin zuen joan zen egueneko udalbatzarrean aurrera: besteak beste, Luis Jose Ballarin alkatearen lanaldi erdiko liberazioa, aurreko legegintzaldietako ordezkarien dietak mantentzea, eta batzorde burutzak Bilduk hartzea onartu zuten egueneko plenoan.
Abstenitu egin ziren gobernu taldearen proposamen honi dagokionez jeltzaleak: udalbatzar eta batzordeetan parte-hartzeagatik dietak jasotzen dituzten moduan, batzarretara kale egiten duten zinegotziak penalizatzea proposatu zuen Bilduk. Pleno batera faltatzeagatik 50 euro, eta batzordeetan kale egiteagatik 30 euroko zigorra izango dute Izurtzako udaleko zinegotziek.
Udalbatzar horretan izendatu zituzte,n bestalde, Bilduko Luis Jose Ballarin alkate eta Maialen Sarasua alkateorde, eta EAJko Oskar Zarrabeitia diruzain.